news

Plastlaus september

30 Ágú 2019

Leikskólinn Hvammur er grænfánaskóli. Við viljum nú taka enn eitt skrefið til að minnka plastnotkun okkar og taka þátt í verkefninu Plastlaus september.

Foreldrar eru beðnir að koma með fjölnota poka fyrir blaut föt, ef slys verða setjum við að sjálfsögðu í brauðpoka eða poka utan af morgunkorni áður en þau fara í fjölnota pokann.

Plastlaus september er árvekniátak sem ætlað er að vekja fólk til umhugsunar um ofgnótt og skaðsemi plasts í umhverfinu og benda á leiðir til að draga úr notkun á einnota plasti. Fjölskyldur er hvattar til að taka þátt í Plastlausum september, við vonum að þátttaka í átakinu leiði til minni plastnotkunar til frambúðar.

Af hverju eigum við að sleppa plasti?

Plast endist í þúsundir ára og er því afar slæmur kostur fyrir einnota notkun. Plast tekur langan tíma að brotna niður og breytist þá í örplast sem ekki er betra fyrir umhverfið.

Plast:

  • -er eingöngu hægt að endurvinna í annað plast af lélegri gæðum.
  • -sem við notum og fer ekki til endurvinnslu, safnast fyrir á urðunarstöðum eða í nátturunni og veldur þar skaða um ókomna tíð.
  • -endar allt of oft í náttúrunni, og þá sérstaklega í ám, vötnum og sjó.
  • -dregur til sín ýmis mengunarefni og þegar það endar í vef lífvera geta efnin þar með endað í fæðu okkar.
  • -inniheldur stundum hormónaraskandi efni (t.d. þalöt) sem eru skaðleg mannfólki.

Nú tökum við enn eitt skrefið og tökum þátt í Plastlausum september. Minnkum notkun einnota plasts í einn mánuð með það að markmiði að draga úr plastnotkun til frambúðar.